لباس اور زینت سے متعلق نئے مسائل:
مفتی ولی اللہ مجید قاسمی ۔
انوار العلوم فتح پور تال نرجا ضلع مئو.
5- تصویر دار کپڑے:
ایسے کپڑے کو پہننا جس پر کسی جاندار کی تصویر بنی ہو مرد و عورت ہر ایک کے لیے ممنوع ہے چنانچہ ایک حدیث میں ہے :
عَنْ عَلِيٍّ قَالَ صَنَعْتُ طَعَامًا فَدَعَوْتُ النَّبِيَّ صَلَّى اللَّهُ عَلَيْهِ وَسَلَّمَ فَجَاءَ فَدَخَلَ فَرَأَى سِتْرًا فِيهِ تَصَاوِيرُ فَخَرَجَ وَقَالَ إِنَّ الْمَلَائِكَةَ لَا تَدْخُلُ بَيْتًا فِيهِ تَصَاوِيرُ(سنن نسائى:5351)
حضرت علی کرم اللہ وجہہ کہتے ہیں کہ میں نے کھانا بنایا اور نبی ﷺ کو دعوت دی ۔آپ ﷺتشریف لائے تو دیکھا کہ ایک پردے پر تصویر بنی ہوئی ہے ۔آپ فورا واپس ہوگئے اور فرمایا:فرشتے اس گھر میں داخل نہیں ہوتے ہیں جس میں تصویریں ہوں۔
اور حضرت عائشہ کہتی ہیں:
قدِمَ رَسُول اللَّه ﷺ مِنْ سفَرٍ، وقَد سَتَرْتُ بِقِرَامٍ عَلَى سَهْوَةٍ لِي فِيهِ تَصَاوِيرُ فَنَزَعَهُ وَقَالَ أَشَدُّ النَّاسِ عَذَابًا يَوْمَ الْقِيَامَةِ الَّذِينَ يُضَاهُونَ بِخَلْقِ اللَّهِ (سنن نسائى:5356
رسول اللہ ﷺ ایک سفر سے تشریف لے آئے اور میں نے اپنے ایک طاق پر تصویر دار پردہ لٹکا رکھا تھا ۔آپ نے اسے وہاں سے ہٹادیا اور فرمایا:قیامت کے دن سب سے سخت عذاب ان لوگوں کو ہوگا جو اللہ کی تخلیق کی نقل بناتے ہیں ۔